Версия для слабовидящих Последний номер: 18 Мая 2020 года
16+
газета республики Коми

Репин

0 244 Общество

     Физкультура велöдысь Роберт Александрович Тренин — медрадейтана учитель. Во комын нин кольöма, а пыр быттьö син водзын: шöркост арлыда, косiник, шепель кыла да витшкыль кока. Сувтöдас классö да гораа шуас: «Лыс-два-а, лыс-два-а!».
      Нöшта пöпуттьö велöдiс пение. Локтас урок вылö, тутш-тотшкерас дöска пöвйö.
     - Но-ко, няв-ракаяс, ставöн öттшöтш: ми-па-а, ми-па-а…
     Корас кодöскö дöска дорас, сюяс киас указка да тшöктас тотшкöдны сьылан ладсö.
    Öтчыд локтiс урок вылö - вом тыр нюмыс, ки тыр карандаш. Ставöн тшöк ланьтiсны, виччысьöны, мый водзö лоö. А Роберт Александрович матыстчис öшинь дорö да ёна чуймис, быттьö аддзис шензьöданатор:
     - Но-ко, видзöдлöй ывла вылас.
    Ми ставöн уськöдчим ыж стада моз, ляскысим стеклöас. Немтор выльыс абу: сёр ар, öдва чусалö шондi, ис ни ру куйлöны сьöд муяс, мый позьö, важöн нин куралöма да идралöма. Сэн и тан шевгысьöмаöсь керкаяс.
    - Тырмас, пуксьöй, - вежсьöм гöлöсöн шыасис велöдысь да, кор лöнис парта пöвйöн клопайтöмыс, друг юалiс: - Кодi тöдö художник Репинöс?
     - Ме тöда, - чургöдiс кисö öти зонка. - Тайö миян сиктысь Репин дядь, вöралысь. Коркö сiйö, сё збыль, рисуйтiс Ен öбраз пöчьяслы вина сулея вылö. Весиг Москваысь волiсны видзöдлыны.
     - Босьтöй карандаш да серпасалöй, кодi кыдзи кужас, мый öшйис паметяныд. А Илья Репин вöлi академикöн. Колö тöдны…
     Ставöн пушиктöны, мыйкö парсалöны кабала вылын. А кор лэптiм юр, чуймим. Дивöсьыс-дивö! Дöска пöв вылын мелöн вöлi рисуйтöма öшиньсайса серпас: ылын руалö тшöкыд вöр, чусалö арся шондi, пласьт куйлöны сиктса керкаяс, весиг дзодзöг кельöб тэрмасьтöг лэбö лунвылö.
     - Ре-пин, - öти морт моз ышловзис став классыс.

Юрий Яковлев

"Выль туйöд" № 81-82 (8270), 2001-öд во, июль 7-öд лун.



ПОХОЖИЕ МАТЕРИАЛЫ
0 949 29.08.2018
Репин
100 лет журналистике Год культуры в Республике Коми 2018 Спиридонов