Версия для слабовидящих Последний номер: 18 Мая 2020 года
16+
газета республики Коми

Вывтi зiль да ноксьысь.

0 965 Старшее поколение

Петö морт пенсия вылö, эновтчö уджысь и торйöдчö аслас коллективкöд. Да быттьöкö кутö гажтöмавны, öд водзын сы мында прöст кад. Сöмын унаöн заслуженнöй шойчöг вылö петысьясысь шуöны, мый абу на тадзи. Кадыс, кыдзи и уджалiгöн, сiдзи жö некытчö оз тырмы.

Тайöс шуö и Глотовоса ань Анна Николаевна Карпова. Сiйö уна во нин пенсия вылын, но весьшöрö пукавны аньлы некор.

Аддзысьлi сыкöд гортдорса градйöрын. Танi сылöн быдмö ставыс, мый вермö сетны миян войвыв. Сувтöдöма кык ыджыд теплица, кöнi быдмöны öгуреч да помидор, градъяс вылын - клубника, кабачок, морков, свеклö, лук. А дзоридзыс мыйта! «Дзоридзсö ме ёна радейта», - шуö сiйö.

Но медся ыджыд ноксьöмыс сылы сюрö скöт дорын бергалiгöн. Ас овмöсын Карповъяслöн кык мöс, куканьяс. Менам волiгöн гортаныс кöзяева вöлiны сы вöсна, мый виччысисны ытшкöм турунлысь косьмöмсö.

Анна Николаевна ачыс абу татчöс, лоö Сыктывдин районса Чухлöмысь. Но со нин 47-öд во олö Удораын. 1972 воын на воис татчö видз-му овмöс техникум помалöм бöрын том специалистöн. Зоотехник дипломöн Анна Сажина сэки веськалiс Глотовоö.

Абу на вунöма сэкся олöмыс. Чорыд веркöса туйяс эз вöвны, Глотовоö лэбалiс самолет. А Косланö, кыдзи зоотехниклы да животноводстваса бригадирлы, колi ветлыны тшöкыда: тулыссянь да арöдз сiйö воöдчылiс мотора пыжöн. Уджавны локтан воö скöтыс Глотовоса отделениеын вöлi 800 гöгöр юр, а бöрыннас воис нин сюрс сё юрöдз. Удж вылö примитiс отделениеса управляющöй Петр Политов. Орччöн пыр вöлi опыта морт Апполинария Мартюшова, ветфельдшер. Син улын 11 доярка да кык сы мында кукань видзысь. И быдлаын вöлi пöрадöк.

31 во сетöма аньлöн видз-му овмöсын зiльöмлы. Уджалiс на эськö и водзö, эз кö висьмы ёна сойыс дойччöм бöрын. Ковмис петны пенсия вылö.

Уна во нин оз уджав Анна Николаевна, но сьöлöмыс пыр висьö видз-му овмöс кисьтöм-рöзöритöм понда. Öд мыйта вын, дзоньвидзалун лои сетöма сэкся войтырыслöн йöв-яй вöчöмö да планъяс тыртöмö. Эз кö пö пöдлавны совхозсö, йöзыс öнöдз на зiлисны, сиктас удж вöлi. А талун томъяслы ыджыд вынсö воштыны некытчö, юны-кодавны сöмын и кольö пö.

- Видз-му олiс коркö бур кадö, государствосянь волiс тöдчана отсöг, но быд бурыслы тай воö сэсся пом. Мыйта трактор-машина сетлiсны, а талун коляс вылас синваыд петö, - шуö ань.

Мед и пенсия вылын Анна Николаевна, но шойччöм йылысь оз мöвпав. Сiйö жö скöт видзöмтöгыд, кытчö мамыс велöдлiс ичöтсянь, овны оз кöсйы. Дояркаöн уджалiгöн на ас овмöсын вöлi мöс, а öнi видзас нин. Найö пö менам сэтшöм жö быдтасъяс, кутшöм и аслам челядь. Пияныс нин шуöны мамыслы, мед дугöдчас сюрукъясöс видзöмысь. А мый нö пö сэсся сиктас вöчны, он кö мöс-кукöн ноксьы?

Со татшöм сiйö морт, вывтi зiль да ноксьысь.

Наталия КАЛИНИНА.

100 лет журналистике Год культуры в Республике Коми 2018 Спиридонов